ӘКІМ АУДАННЫҢ ҚАРТ ТҰРҒЫНДАРЫМЕН КӨРІСТІ
14 наурыз "Көрісу күні - Амал мерекесі" біздің аудан үшін ерекше күндердің бірі. Қай уақыттан бері екенін ешкім тап басып айта алмайды.
Ұрпақтан-ұрпаққа мирас болған дәстүр сол күні жастардың ауыл үлкендеріне көрісуі.
Бұл ізгі дәстүрді берік ұстанған аудан әкімі Асқар Қайырғалиұлы бүгін Ойыл селосындағы қарияларға көрісті. Аудан басшысы бастаған ел ағалары алдымен тыл ардагері Бақытжан Әлжанов ақсақалдың үйіне барды. Совет Үкіметі тұсында ұзақ жыл шаруашылықта еңбек еткен қария ауыл азаматтарына алғысын жаудырып, батасын берді.
Одан кейін аудан басшысы ауыл ақсақалы Күншыққан Мұхамедиярұлы және кезінде мемлекеттік қызметте жасаған Сансызбай Өткелбай қарияға көрісті.
«Қарты бар елдің қазынасы бар» — демекші, сіздердің әрбір бата-тілектеріңіз жастарға рухани азық.
Ортамызда отыра беріңіздер. Біздерге жыл сайын Сіздермен көрісуге жазсын! – деді аудан әкімі.
«Сыйласаң кәріңді, жарылқаймын бәріңді!» дейді екен. «Ұлық болсаң, кішік бол!», — дегендей, үлкенді сыйлап, көрісіп келіп жатқандарыңа рақмет! – деген қариялар ақ батасын берді.
