«ТАЗА ҚАЗАҚСТАН» ӘР ҮЙДЕГІ ТӘРБИЕДЕН БАСТАЛАДЫ!
«Жазғытұры қалмайды қыстың сызы» дегенмен, тіке түскен күннің көзі жер бетіндегі тіршілікке күннен-күнге сән беріп жатыр... Бірақ, қар кеткеннен кейінгі «әттеген-айлар» да бар. Қыс бойғы қардың астына тыққан «қылығымыздың» арықпен ағып кеткенінен қалғаны әр жерден қылаң берді.
Мемлекет басшысының бастамасымен «Таза Қазақстан» акциясы жыл бойы жүргізіліп жатыр. Бірақ, біздің ортақ мүлікке, қоғамдық меншікке деген көзқарасымыз өзгермей тұр. Анасындай, әкесіндей адамның еңбегін бағалау да екінші сатыда тұр. Жуырда, балабақшадан баласын жетектеп шығып келе жатқан жас келіншек сусынның құтысын жолдың жиегіне тастай салды. Оны көрген бес жасар баланың да солай жасамасына кепілдік жоқ. Тақырыптың «Таза Қазақстан» әр үйдегі тәрбиеден басталады! — деп тікелей қойылуы да сондықтан! Сонымен қатар, биылғы жылдың 28 наурызы күні аудан әкімінің өкімімен ауданның елді-мекендері аумағында көгалдандыру, санитарлық тазарту және абаттандыру шараларын ұйымдастыру туралы 29 наурыз бен 31 мамыр аралығында екі айлық жарияланды. Айлықтың аясында 19 сәуір күні «Бүкіл қазақстандық орман отырғызу күніне» және «Жасыл жапырақ» акциясына атсалысу мақсатында көгалдандыру жұмыстары жүргізіледі. Әрине, талды есеп үшін егу бар, оны күтіп өсіру бар. Көп әріге бармай-ақ, соңғы он жылда аудан аумағында есеп үшін егілген талдарды күтіп, баптағанда ендігі орманның ортасында отыратын едік…
Жақында бір әнге Ойылдың үстінен түсірілген бейнебаянды көрдім. Саябақтар мен Ойыл кәсіптік колледжінің ауласы болмаса, басқа жерлерде тал әр жерде қылтияды. Шөлейтті аймақтағы ауыл сияқты. Жаңа құрылыс жақ тіпті «тыржалаңаш». Сондықтан, жоғарыдағы екі акцияға да әр аула атсалысуы тиіс. Әркім өз ауласына тал егіп, оның өсіп кетуіне күтім жасаса құба-құп! Тіпті жеміс ағаштарын неге екпеске?» Атадан мал қалғанша, тал қалсын!» дегендей, ертеңгі күні жемісін балаң, болмаса немерең жеп, «менің атамның алмасы!» деп марқаймай ма?
Қазақстанның оймақтай бір бөлшегі — Ойыл біздің ортақ үйіміз! Бұл ортақ үйдің тазалығына бәріміз бірдей жауаптымыз!
С. ХАМЗИН,
Ойыл селосы.
