БРИТАНДЫҚ HERIOT-WATT UNIVERSITY МЕНЕДЖЕРЛЕРІ АҚТӨБЕ КАМПУСЫНА КЕЛДІ

Жұбанов университеті базасында орналасқан Heriot-Watt университетінің Ақтөбедегі кампусына академиялық бағдарламалар менеджері Дэниел Свонсон және ағылшын тілі бойынша академиялық менеджер Пав Драбкова келді.

Британдық Heriot-Watt University менеджерлерінің Ақтөбедегі кампусқа келудегі басты мақсаты – 1 курс студенттерінің оқу процесін ұйымдастыруға дайындық жұмыстарын жүргізу, алдағы семестрге дайындық және оқу сапасын қамтамасыз ету жүйесін нығайту.

Халықаралық мамандар білім беру процесінің сапасы мен академиялық адалдықты қамтамасыз етуде маңызды рөл атқарады. Олар студенттерге заманауи білім беру әдістемелерін ұсынуға және оқу бағдарламаларының жаһандық стандарттарға сәйкестігін бақылауға ықпал етеді.

Айта кетейік, Heriot-Watt университеті өз кампустарында бірыңғай оқу бағдарламаларын және емтихан сессияларын ұйымдастыру жүйесін қолданады. Ақтөбе кампусындағы студенттер британдық университет стандарттарына сәйкес білім алып, әлемдік деңгейдегі диплом алу мүмкіндігіне ие. Бұл үдерісті халықаралық тәжірибеге ие мамандар мен жергілікті оқытушылар құрамы қамтамасыз етеді, осылайша академиялық адалдық пен сапа деңгейі сақталады.