ҰЛТ ТАҒДЫРЫНА ҚАТЫСТЫ ҰЛТТЫҚ ҚҰРЫЛТАЙ
Бүгін Бурабай төрінде өткен Ұлттық Құрылтайда Президент Қасым-Жомарт Тоқаев еліміз үшін аса маңызды мәселелерді көтеріп, алдағы бағыт-бағдарды айқындады. Бұл жиын – билік пен халықтың үнқатысу алаңы ғана емес, елдің келешегін бірлесіп қалыптастыратын маңызды кеңес.
САЯСИ ӨЗГЕРІСТЕР: БИЛІК ХАЛЫҚҚА ЖАҚЫНДАЙ ТҮСТІ
Президент соңғы үш жылда жасалған реформалар Қазақстанды жаңа сипаттағы мемлекетке айналдырғанын атап өтті. Ең басты өзгерістер – жергілікті басқару жүйесінде. Бұрын ауыл әкімдерін тағайындау жоғарыдан болса, қазір олардың 72%-ы халық сайлаған жаңа тұлғалар. Оның ішінде үштен бірі – мемлекеттік қызметке мүлде қатысы болмаған қарапайым азаматтар.
Енді бұл үрдіс жалғасын тауып, биылдан бастап барлық аудан әкімдерін де халықтың өзі таңдайтын болады. Бұл халықтың билікке сенімін арттырып, ел басқаруға ықпалын күшейтпек.
ЭКОНОМИКА ЖӘНЕ ИНФРАҚҰРЫЛЫМ: ҚАЗАҚСТАН – ЕУРАЗИЯ ЖҮРЕГІ
Тоқаев Қазақстанның транзиттік әлеуетіне ерекше тоқталды. Біз – Еуразия құрлығының қақ ортасында тұрған елміз, бұл логистика мен саудада үлкен мүмкіндіктер береді. Осы бағытта:
Жаңа логистикалық орталықтар мен қоймалар салынады,
Теміржол желілері кеңейтіледі,
Теңіз тасымалы жүйесі нығайтылады,
Тасымал тарифтері икемді етіп қайта қаралады.
Бұл тек сыртқы сауданы ғана емес, ішкі нарықтың дамуын да жеделдетеді.
Бұдан бөлек, биыл Қазақстанда суперкомпьютер іске қосылмақ! Бұл – ақпараттық технологиялар мен ғылым саласына серпін беретін үлкен қадам.
БЕС ӘЛЕУМЕТТІК ЗҰЛЫМДЫҚПЕН КҮРЕС
Тоқаев қоғамда асқынып тұрған бес үлкен мәселеге ерекше тоқталды:
1️⃣ Есірткі – Әсіресе синтетикалық есірткілердің таралуы қауіпті деңгейге жетті. Енді оны өндіру мен сатуға ең ауыр жаза қолданылады.
2️⃣ Вейп індеті – Вейптерді сатуға тыйым салынатын заң қабылданбақ.
3️⃣ Құмар ойындар – Жастарды ойынқұмарлықтан сақтап, заң жүзінде шектеулер енгізіледі.
4️⃣ Тұрмыстық зорлық-зомбылық – Буллинг, агрессия, вандализмге қарсы заң күшейеді.
5️⃣ Ысырапшылдық – «Көрпеңе қарай көсіл» деген қағида күнделікті өмірдің нормасына айналуы тиіс.
ҰЛТТЫҚ ҚҰНДЫЛЫҚТАР: ҚАЗАҚЫ БОЛМЫСЫМЫЗДЫ САҚТАЙМЫЗ
Қазақ тілі мен мәдениетін дамыту мәселесі де назардан тыс қалған жоқ. Президент:
Қазақ тілін күнделікті қарым-қатынастың тіліне айналдыру,
Ұлттық киімдерімізді қайтадан сәнге айналдыру,
Мәдени мұрамызды дәріптеу керектігін атап өтті.
ҚОРЫТЫНДЫ: БҰЛ – БІЗДІҢ БОЛАШАҒЫМЫЗ!
Ұлттық Құрылтай – жай ғана жиналыс емес, болашақтың бағдарын айқындайтын маңызды кеңес. Президент айтқан бастамалар – елімізді жаңа деңгейге көтеретін стратегиялық шешімдер. Ендігі міндет – осы айтылғандарды іс жүзінде жүзеге асыру!
Қазақстанның ертеңі – бүгінгі дұрыс шешімдерге байланысты!
Жиеналин Еркін
«AMANAT»партиясы Ойыл аудандық филиалының атқарушы хатшысы
