Мектептен тыс жерде оқыс оқиға болса, оған ұстаз жауапты емес — Президент https://kaz.inform.kz/news/mektepten-tis-zherde-okis-okiga-bolsa-ogan-ustaz-zhauapti-emes-prezident-edf874/

АСТАНА. KAZINFORM — Мектептен тыс жерде, ата-аналардың жауапсыздығынан оқыс оқиға болса, оған ұстаз жауапты емес. Бұл туралы елордада өтіп жатқан ұстаздардың республикалық тамыз конференциясында Мемлекет басшысы Қасым-Жомарт Тоқаев айтты.

Фото: Ақорда
— Мұғалімнің құқығын қорғау мәселесі әрдайым басты назарда болуға тиіс. Мен сөз басында ұстаздардың өз міндетінен тыс жұмыстардан босатылғанын айттым. Бірақ, кейде жергілікті билік өкілдері заң талаптарын өрескел бұзып жатады. Прокуратура органдары мұндай заң бұзушылықтарға тосқауыл қоюы керек. Сондай-ақ балаларға қатысты кез келген жазатайым жағдай үшін де мұғалімді жазалау орынсыз деп санаймын. Мектептен тыс жерде, ата-аналардың жауапсыздығынан оқыс оқиға болса, оған ұстаз жауапты емес, — деді Қасым-Жомарт Тоқаев.

Мемлекет басшысы Алматы облысында түлектер арасында болған қайғылы жағдай үшін директор мен мұғалімдер жауапқа тартылып, жұмыстан шығарылғанын еске салды.

— Министрлік олардың мүддесін қорғап қалды. Дұрыс. Біз мұндай келеңсіздікке жол бермеуіміз керек. «Педагог мәртебесі туралы» заңға ұстаз құқығын қорғау жөнінде өзгерістер енгізу қажет деп санаймын. Мемлекеттің міндеті – мұғалімнің қоғамдағы беделін және мәртебесін мейлінше арттыру, — деді Мемлекет басшысы.

Президент Маңғыстауда балалардың сапасыз тамақтан уланып қалу оқиғасына да назар аудартты.

— Осы сұмдық жағдайдан кейін мектептегі тамақтың сапасын қадағалау жұмысын Денсаулық сақтау министрлігі толығымен өз міндетіне алды. Бұл өте дұрыс шешім болды. Жалпы, білім саласы – мемлекет үшін стратегиялық мәні бар сала. Сондықтан, құзырлы мемлекеттік органдар білім саласындағы мәселелерден сырт қалмауы керек. Түптеп келгенде, балалардың амандығы, олардың денсаулығы және сапалы білім алуы – еліміздің келешегіне тікелей қатысы бар мәселе, — деді Қасым-Жомарт Тоқаев.

Мемлекет басшысының пайымынша, мұғалімдер мемлекеттік маңызы бар жұмысты атқарып жатыр.

Дегенмен, ұстаздың назары бала оқыту ісінде болуға тиіс.

Тегтер:
Қазақстан Президенті
Қасым-Жомарт Тоқаев
Мектеп
Қоғам

https://kaz.inform.kz/news/prezidenttk-zhastar-kadr-rezervne-rkteudn-3-kezenne-zhberlgen-kandidattar-belgl-boldi-09eb6f