Президент Жолдауы – партия ұйымы мүшелерінің назарында

Еліміз бойынша Мемлекет басшысы Қасым-Жомарт Тоқаевтың Қазақстан халқына арнаған кезекті Жолдауын түсіндіру және талқылау жұмыстары кеңінен жүргізілуде. Осы мақсатта Ойыл ауданындағы «AMANAT» партиясының «Қараой» бастауыш партия ұйымында дөңгелек үстел отырысы өтті.
Жиынға жуырда «AMANAT» партиясы атынан сайланған Қараой ауылдық округінің әкімі Абзал Майқанов және бастауыш партия ұйымының мүшелері қатысты.
Жолдаудағы басым бағыттар
Басқосу барысында Абзал Майқанов Мемлекет басшысының Жолдауында айтылған негізгі мәселелерге кеңінен тоқталды. Ол саяси реформалардың жалғасуы, әділетті әлеуметтік саясат, ауыл шаруашылығын дамыту, халық табысын арттыру мен жастарға жаңа мүмкіндіктер ашу секілді басым бағыттарды интерактивті құралдар арқылы түсіндіріп берді.
«Жолдау – алдағы жылдардағы даму бағытымызды айқындайтын стратегиялық құжат. Онда ауыл мен ауылдық аймақтың мәселелері де ерекше орын алған. Бұл біз үшін аса маңызды», – деді ол өз сөзінде.
Партия мүшелерінің қолдауы
Дөңгелек үстелде бастауыш партия ұйымының мүшелері Жолдауда көтерілген міндеттерді жан-жақты талқылады. Қатысушылардың пікірінше, Жолдаудағы бастамалар елдің әлеуметтік-экономикалық дамуына жаңа серпін береді әрі ауылдық жерлерге нақты қолдау көрсетудің тетіктерін айқындайды.
«Біз, партия мүшелері, Мемлекет басшысының саясатын толық қолдаймыз. Әрқайсымыз Жолдаудағы тапсырмалардың орындалуына үлес қосуға дайынбыз. Бұл – біздің азаматтық әрі партиялық жауапкершілігіміз», – деген ой ортаға салынды.
Ортақ міндет
Жиын соңында бастауыш партия ұйымының мүшелері Президент Жолдауын іске асыру – тек мемлекеттік органдардың ғана емес, партия қатарындағы әрбір азаматтың басты міндеті екенін атап өтті.
Қорытындысында, «Қараой» бастауыш партия ұйымы мүшелері Мемлекет басшысының Жолдауын толық қолдап, оның орындалуына белсене атсалысуға дайын екендіктерін білдірді. Бұл – партия мүшелерінің ел болашағына деген жауапкершілігі мен берік ұстанымының айқын көрінісі.