АҚТӨБЕ ОБЛЫСЫНЫҢ КӘСІПКЕРЛЕР ПАЛАТАСЫ МЕН ЭКОНОМИКАЛЫҚ СОТ ТАТУЛАСТЫРУ РӘСІМДЕРІН ДАМЫТУ ЖӨНІНДЕГІ МЕМОРАНДУМҒА ҚОЛ ҚОЙДЫ

Ақтөбе облысының Кәсіпкерлер палатасы мен Ақтөбе облысының Мамандандырылған ауданаралық экономикалық соты татуластыру рәсімдерін дамытуға және экономикалық дауларды сотқа дейін реттеу тетіктерін жетілдіруге бағытталған өзара ынтымақтастық туралы меморандумға қол қойды. Құжат кәсіпкерлік субъектілерінің құқықтары мен заңды мүдделерін қорғау мақсатында медиация мен келіссөздер рәсімдерін кеңінен қолдану арқылы тараптардың өзара іс-қимылын нығайтуды көздейді.

Ынтымақтастықтың негізгі бағыттарының бірі — Мамандандырылған ауданаралық экономикалық сот ғимаратында «Атамекен қабылдауы» кабинетінің жұмысын қайта жандандыру. Оның аясында кәсіпкерлер құқықтық консультациялар алып, дауларды келіссөздер арқылы шешуге мүмкіндік алады, сондай-ақ істі сотта қарауға дейін татуластыру рәсімдерін пайдалана алады. Сонымен қатар тараптар ақпараттық-түсіндіру жұмыстарын бірлесіп жүргізіп, кабинет қызметінің тиімділігін талдап, кәсіпкерлердің құқықтарын қорғау саласындағы заңнаманы жетілдіру жөнінде ұсыныстар әзірлейді.

Ақтөбе облысының Кәсіпкерлер палатасының директоры Дидар Боранқұловтың айтуынша, Палата мен экономикалық сот арасындағы өзара іс-қимыл тәжірибесі өзінің тиімділігін әлдеқашан дәлелдеген.

«Бүгін біз 2019 жылы алғаш рет ашылған медиация кабинетінің жұмысын қайта жандандырып қана қоймай, Сот пен Кәсіпкерлер палатасы арасындағы одан әрі ынтымақтастықты нығайтатын меморандумға қол қойып отырмыз. Тәжірибе көрсеткендей, кәсіпкерлік субъектілері арасындағы көптеген дауларды сот шешімін күтпей-ақ келіссөздер арқылы шешуге болады. Бұл іскерлік қарым-қатынастарды сақтауға, дауларды шешу мерзімін қысқартуға және қосымша қаржылық шығындардың алдын алуға мүмкіндік береді», — деді Дидар Боранқұлов.

Оның айтуынша, биылғы жылдың бірінші жартыжылдығында Палатаға кәсіпкерлердің құқықтарын қорғау мәселелері бойынша 134 өтініш келіп түсті. Оның 103-і қаралып, 51 мәселе кәсіпкерлердің пайдасына шешілді. Нәтижесінде 12 кәсіпкерлік субъектісінің жалпы сомасы 119 миллион теңгеден астам мүліктік құқықтары қорғалды. Сонымен қатар өтініштердің 8,2 пайызы кәсіпкерлер арасындағы азаматтық-құқықтық дауларға қатысты болып, олардың басым бөлігін сотқа дейінгі тәртіппен шешуге мүмкіндік бар екені байқалды.

Меморандум аясында тараптар жауапты қызметкерлерді айқындап, татуластыру рәсімдерін қолдануға болатын істердің апта сайынғы тізбесін қалыптастырады, кабинет жұмысының есеп журналын жүргізеді және тоқсан сайын нәтижелерге мониторинг жасайды. Бұл бірлескен жұмыстың тиімділігін жүйелі бағалауға және кәсіпкерлердің құқықтарын қорғау тетіктерін одан әрі жетілдіруге мүмкіндік береді.

Меморандумға қол қою сот жүйесі мен өңірдің бизнес-қоғамдастығы арасындағы өзара іс-қимылды нығайтып, кәсіпкерлер үшін қолайлы құқықтық орта қалыптастыруға және дауларды сотқа дейін тиімді шешу тетіктерін дамытуға бағытталған маңызды қадам болмақ.

Мамандандырылған ауданаралық экономикалық сотының төрағасы Алғабек Жүсіпов Кәсіпкерлер палатасының басшылығына алғыс білдіріп, меморандум кәсіпкерлердің құқықтарын қорғау бағытындағы ынтымақтастықты күшейтіп, татуластыру рәсімдерін кеңінен дамытуға ықпал ететінін атап өтті.

Аталған меморандумға қол қою Қазақстан Республикасы Президентінің бастамасымен жүзеге асырылып жатқан «Заң және тәртіп» идеологиясын іске асыру, сондай-ақ Ақтөбе облысы әкімдігі, облыстық прокуратура және Ақтөбе облысының Кәсіпкерлер палатасы арасында бекітілген үшжақты іс-қимыл жоспары аясында жүзеге асырылды.