МәдениетРухани жаңғыру
ҰЛТТЫҚ АСПАП ҰЛЫҚТАЛҒАН КҮН
Ұлы мұрамызды ұлықтайтын қасиетті мереке – Ұлттық домбыра күні. Қазақ халқы үшін домбыра – ұлттық аспап қана емес, қазақтың жаны мен қаны, ары мен бары, қасиеті мен киесі.
Домбыра – халықтың қайғы мен мұңын, қуаныш пен шаттығын жеткізген сенімді серігі. Ұрпақтан-ұрпаққа бабалардың үнін жеткізіп, Ұлы Даланың сазды сарынын жырлаған да домбыра. Жоралы жұртымыздың қатпар-қатпар тарихынан, асу да асу кезеңінен сыр шерткен күй-толғау, сыңғырлы сұлу ән-әуен құлағымыздан кетпесін, халқымыздың қасиетті ұлттық аспабы – Домбыра төрімізден түспесін! Ұлттық домбыра күніне орай Ақжар ауылдық клубы мен кітапханасының ұйымдастыруымен «Ұлы ұлттың баласы , ұлықта домбыраңды!» атты әдеби музыкалық кеш өткізілді. Кеш барысында домбыра туралы бейнекөрсетілім таныстырылып, «Шертер» домбыра үйірмесінің мүшелері «Ерке сылқым», «Тепеңкөк» күйлерін нақышына келтіріп орындады. Кешке ауыл тұрғындары мен оқушылар қатысты.
