Облыстық турнир Тұңғыш Президент күніне арналды

Өткен аптаның соңында Ойыл балалар-жасөспірімдер спорт мектебінде 1 желтоқсан Қазақстан Республикасының Тұңғыш Президенті күні мерекесіне және әдебиеттанушы-ғалым, Қазақстан ғылымы академиясының корреспондент-мүшесі, профессор Әнуар Дербісәлинді еске алу құрметіне арналған тоғызқұмалақтан 2008-2009, 2010-2011, 2012 жылы туылған және одан төмен жастағы жасөспірімдер мен қыздар арасында облыстық ашық турнир өткізілді. Турнирдің ашылу салтанатына ардагерлер мен қоғамдық ұйымдардың басшылары мен өкілдері қатысты. Аталмыш шараға Ақтөбе облысынан 9 команда, оның ішінде Ақтөбе қаласы, Байғанин, Ырғыз, Ойыл аудандарынан 100 оқушы қатысып, бақтарын сынады. ҚР чемпионатының жеңімпаздары мен жүлдегерлері және спорт шеберлігінен үміткер спортшылар қатынасқан облыстық турнир 3 күнге созылды. Облыстық турнирдің жеңімпаздары мен жүлдегерлері Әнуар Дербісәлин ұрпақтарының демеушілігімен мақтау қағаздары, медальдары және естелік сыйлықтармен марапатталды. Дәстүрге айналған облыстық турнир алда әлі де өз жалғасын табатын болады.