Еңбек даңқы мен алғыс күні: Ауыл шаруашылығы қызметкерлерінің кәсіби мерекесі

Биыл бұл мереке ерекше ауқымда аталып өтті. Аймақтағы барлық ауыл шаруашылығы қызметкерлері бір ортаға жиналып, бір жыл бойғы жұмыстың қорытындысын жасады. Мерекелік шараға шаруашылық жетекшілері, еңбек ардагерлері, жас мамандар және өз саласының үздіктері қатысты. Әрқайсысының еңбегі лайықты бағаланып, құрметке бөленді.
Шараның ресми бөлімінде аудан әкімі Асқар Қайырғалиұлы үздік еңбеккерлерді облыс әкімі Асхат Шахаровтың алғыс хатымен марапаттады. Сонымен қатар, көктемгі су тасқыны кезінде аудан халқына демеушілік көрсеткені үшін аудан әкімінің алғыс хатымен марапатталған кәсіпкерлер де болды. Диқаншылар мен малшыларға алғыс хаттар, грамоталар және естелік сыйлықтар табыс етілді. Биылғы жылдың нәтижелері бойынша ауданның алдыңғы қатарлы шаруашылықтары атап өтілді.
Шара төл мереке иелеріне арнап ұйымдастырылған концерттік бағдарламамен жалғасты. Өнерпаздар халық әндері мен билерін орындап, мерекенің сәнін келтірді.
Бұл мереке – ауыл шаруашылығы саласында еңбек етіп жүрген жандардың жанқиярлық еңбегін танудың бір көрінісі. Олардың маңдай тері мен қажыр-қайратының арқасында халыққа сапалы азық-түлік пен тұрақтылық қамтамасыз етілуде. Осылайша, мереке ауыл еңбеккерлерінің мәртебесін көтеріп, жас ұрпақты еңбекке баулу мен ауыл шаруашылығына қызығушылығын арттыруға үлкен үлес қосуда. Бұл күн – тек марапат пен құрмет күні ғана емес, болашаққа жаңа мақсаттар қойып, ауыл шаруашылығының одан әрі өркендеуіне серпін беретін күн.