«АҚТӨБЕ – ТАРЫНЫҢ АСТАНАСЫ» Гастрофестивалда көпшіліктің назары Ойылдың өнімі мен өнеріне ауды
Өткен жексенбі Ақтөбе қаласының орталығында өңірдің символы – тары өніміне арналған «Ақтөбе – тарының астанасы» атты гастрофестиваль сәтті өтті. Мыңнан астам қонақ, оның ішінде туристтер, қала тұрғындары мен облыс аудандарынан келген қатысушылар ұлттық тағамдар, дәстүрлер мен гастрономиялық инновациялар тоғысқан ерекше атмосферада бас қосты.
Фестиваль қонақтары дәстүрлі рецепттерден бастап фьюжн стиліндегі авторлық интерпретацияларға дейін тарыдан жасалған 50-ден астам тағамның дәмін татып көрді.
Айырықша танымал болған – тары шайы, қанық дәмі мен пайдалы қасиеттерімен ерекшеленетін, қазақ даласында ғасырлар бойы тұтынылған дәстүрлі сусын.
Сонымен қатар, шеберлік сағаттары, қолөнер жәрмеңкесі мен дәм тату аймақтары фестивальдің гастрономиялық мазмұнын толықтырып қана қоймай, жергілікті фермерлер мен қолөнершілерге өз өнімдерін ұсынуға мүмкіндік берді.
Ерекше назар тарының жоғары өнімділігі бойынша әлемдік рекорд орнатқан көрнекті агроном Шығанақ Берсиевтің туған өлкесі – Ойыл ауданының қатысуына аударылды. Қонақтар аудандық мұражайдан әкелінген бірегей экспонаттарды тамашалап, тары өсіру тарихымен, оның рухани және мәдени мәнімен танысты.
Тарыны өңдеудің дәстүрлі әдістері көрсетіліп, театрландырылған қойылымдар ұсынылды – бұл фестивальді тек дәмді емес, сонымен қатар танымдық шараға айналдырды.
