Аудан орталығына 18 шақырым Амангелді ауылы ауданның ең үлкен елді мекені. Халық саны тұрақты, 100 ден аса түтіні бар. Оқушылар жеткілікті. Бүлдіршіндердің саны көңіл қуантады. Демографиялық динамикасы жақсы. Бұл жақта жыл сайын 5-6 жаңа үйден салу үрдісі жақсы қалыптасқан.
Тіпті, мектептегі бала саны кейбір ауылдық округтің орталығынан артық. Сондықтан да, шағын ауылдардың ішінде алғашқы болып ауыз су жүргізілді. Жаңа медпункт салынды. Екі қабатты сәулетті мектебі де бар. Әсіресе, жеке тұрғындардың жыл сайын үй салуы ауылдың келбеті мен халық санына үлес қосып келеді. Тағы бір сүйсінетініміз – жастардың ұйымшылдығы, ауыз бірлігі. Жаздай бөлек-бөлек бригада құрып, ауданға, қалаға барып құрылыс жұмыстарын атқарып табыс табады. Демек ерінбеген адамға жаздай кәсіп бар дегенді ағалары бастап, інілері қостап, іспен үлгі болып отыр. Бұл біріншіден баланы үкіметке алақан жайып отырмай, еңбекке баулу болса, екіншіден балаларының нәпахасы.
